Наурзбаева З., Калаус Л.: Бату мен достарының алтын тостағанды іздегені

Мектептегі сабақтан шаршап, тентек сыныптастарынан жәбір көріп жүрген Батудың өмірі бір сәтте өзгереді. Күнделіктің мұқабасындағы суреттен шыққан сақ патшазадасы Аспара баланы адам аяғы жетпес жерге сапарға ертіп әкетеді. Сол сапардан кейін-ақ Батудың әр күні шытырман хикаяттарға толы болады. Жылан патшасы Бапы ханның еліне барғанының өзі не қылған керемет десең- ші. Нендей қауіпті сапар болса да, Батудың жанында айнымас, сенімді серіктері бар, ал жолбасшысы – елінің тарихы мен көне мәдениеті, аңыздары мен шежі- релері.

Мектепте оқитын балаларға арналған.

Зира Наурызбай 1967 жылы Алматыда дүниеге келген, философия ғылымдарының кандидаты (PhD), қазақ мәдениеті, музыкасы, мифология жайындағы Otuken.kz сайтының модераторы.

«Қазақтың мәңгі аспаны» (2013, 2020 жылдары ) және «Серікбол Қондыбайдың арғықазақ мифологиясындағы әйел бейнелері» (орыс тілінде, 2021 жылы) атты, қазақ тарихындағы көрнекті тұлғалар туралы «Төрт бұлт» (2017 жылы) деп аталатын ғылыми-көпшілік кітаптарының авторы. «Алтын қалам» сыйлығының «Кітап лайк» номинациясындағы жеңімпазы. Сонымен қатар көпшілікке арналған деректі және көркем кітаптар жазады. Ғылыми және көркем дүниелері Ресей, АҚШ, Финляндияда жарық көрген.

Лиля Калаус 1969 жылы Алматыда дүниеге келген. ҚазҰУ филология факультетін тәмамдаған, жазушы, редактор, сыншы, сценарист, радиожүргізуші, суретші. 2001–2014 жылдары «Книголюб» әдебиет журналының бас редакторы қызметін атқарған. Жазу шеберлігі курстарының авторы.

«Сорос-Казахстан-Дебют» әдеби байқауының І және ІІІ сыйлығының иегері (1996 жыл). Орталық Азия елдеріндегі Үшінші Ашық кітап форумы және әдеби фестивалінің жеңімпазы (2014 жыл). «Рух» халықаралық әдеби байқауының жеңімпазы («Детская литература. Проза» номинациясының І орын иегері, 2017 жыл). Қазақстан Жазушылар одағының мүшесі. Қазақ Пен-клубының мүшесі.

«Бату мен достарының Алтын тостағанды іздегені» АҚШ-тың «Amazon Publishing» баспасында ағылшын тілінде басылып жатыр.