Дүзбаев Ж.: Түркілер. Бабалар жолымен. 1 том

20 ғасырдың бірінші жартысында түркі халықтарының, оның ішінде қазақ халқының басынан кешкен үлкен трагедиясы туралы зерттеулер аз жазылып, көптеген сұрақтарға бүгінгі күнге дейін әлі жауап берілмей келе жатыр. Осы тақырып төңірегінде тарихшы, тәуелсіз зерттеуші Жанат Дүзбаевтың үш томнан тұратын «Түркілер. Бабалар жолымен» атты кітабы жазылып шықты. Автор кітаптарындағы тарихи оқиғалар келесі кезеңдерді қамтиды: 1916-1918 жж., 1921-1923 жж., 1928-1933 жж.
Ізденуші оқырман назарын Қазақ даласы мен Орта Азия жерінде, оның ішінде Түркістан өлкесіндегі Жетісудағы патшалық, большевиктік Ресей империясының сол кезде жүргізген отаршылдық саясатына аударып, қазақ халқының осы кезеңде тартқан азабы мен арпалысын баяндайды.
Бірінші кітаптқа негіз болған әртүрлі деректер, мұрағаттық телеграммалар оқырман қауымды Ақпан, Қазан төңкерістерінің салдары мен себептерімен, сол кездегі түркі зиялыларының, оның ішінде Мұстафа Шоқай мен Мұқаметжан Тынышбайұлының өмірлік жолымен таныстырады.
Автор екінші кітабында кеңестік ұжымдастыру кезіндегі қазақ халқының басынан кешкен үлкен трагедиясын шынайы суреттейді. Қазақ даласындағы басқыншылардың саясатына қарсы тұрған ұлт зиялыларының әрекеттері тарихи құжаттармен жеткізілген.
Автордың үшінші кітабының негізгі мазмұны 1929-1930 жылдары кеңестердің жүргізген саясатына қарсы Жетісу өлкесінде, соның ішінде Ақсу, Сарқан аудандарындағы көтерілістері төңірегінде. Кітапты жазу барысында автор көптеген деректермен, мұрағат материалдарымен қатар осы көтерілістерге қатысқан азаматтардың ұрпақтарының естеліктерін пайдаланады.
Халықтың азаттық, егемендік үшін айбатты күресі баяндалатын кітаптардың негізгі идеясы — түркі халықтарының бірлігі мен тұтастығы.
Үш кітаптан тұратын жинақ Қазақстан тарихына қызығушылық танытатын көпшілік оқырман қауымға, зерттеушілерге, студенттерге арналады.